(1880s-1920s) Vaste al cabu
link
- ¿ Vaste al cabu ?
- Sí, mio vida.......
Dios o´l diablu nos aparta.
Pero non llores......
- Non lloro.............
- Entós de qué ye esa llárima
que esmucida de los güeyos
moya to mexella pálida ?
- No e llárima...........
- Desemules
demasiado bien, rapaza.
- Non, si non lloro.
- Par Dios
que será de mala gana.
Tú bien quedrís non llorar
porque yes mui vergonzada,
pero contra to deséu
el corazón llora n´alma,
el alma llora nos gúeyos
y los gúeyos sin tardanza
lo mesmu que tú me niegues
tán echandótilo´n cara.
- Pos........ sí.......ye verdá.........
- Mio xoya
xoyina mía encantada
pa qué´l encultes si´l llantu
d´esa gotina qu´esbarria
dende tos güeyos de virxen
a to mexella de nácar,
ye lo más puru que tienes
en to corazón de santa.
- ¡ Ay de min........ !
- ¿ Qué t´acongoxa ?
¡ Ay ! la pena que me mata.
Non siento, non, to partida,
non siento ¡ ay ! que te vayas.
- ¿ Pos qué sientes ?
- Ay, qu´atopes
sepulcru na mar salada,
sepulcru´n onde non pueda
fincame yo arrodillada.
Un puñadiquín de tierra
que pueda quien tantu t´ama
sementar de siempre vives
pa que vivas tú´n mio alma
cada vez que les columbre
so la foya que te guarda.
-¡ Qué coses tienes ! Atendi.
¿ Nunca prebasti una llárima ?
¿ Di, mio reina ? cuando amantes
a los güeyinos con ansia
s´agolpen y a riegu llenu
esnidien sobre to cara
y unes fuxen, cuerren, caen
despeñades na garganta,
sobre la triste mexella
dexando un rastru qu´abrasa,
y otres a saltos entiérrense
nesa boquina de grana,
¿ nunca-yos ponxisti la llingua ?
¿nunca-yos tomasti sostancia ?
-Mil veces
-Non conocisti
qu´aquella gotina d´agua
al prebala ye amargosa
y saladina al gustala ?
Pos atendi, d´esa mar
que de tan estensa plasma
son les llárimes que llora
n´oriella la xente humana.
¿ Non oyisti llamales pelres ?
Pos tamién ye po la causa
de que pelres son xoyines
de muchísima emportancia
que tán guardades en cónchares
que tan avarientu guarda
en so senu´ l golfu Pérsicu
so los bálamos del agua
¿ Non-yos llamen de coral
a tos llabinos de grana,
espuma la blanca ñeve
que se cuelle en to garganta,
peñedu a to corazón
cuando l´amor non l´amansa,
trucha a ti si tas contenta
y pez cuando tas bien sana,
sosa si non tas graciosa
y cuando lo tas, salada ?
Si son salados los güeyos
y salada to mirada
y salada to presencia
y salada to arrogancia
y saláu isi sudor
que los llabores arranca,
y to fermosa cabeza
ye de coral,pelra y nácar,
d´agua salada tos llárimes
y d´espluma to garganta,
cómo quies que tenga miedu
a embarcame pa la Habana
si abondas con que tú ximas,
si con que tú llores basta
pa que yo tome más fuelgu
y me meta más en gana.
Pero non llores agora
que maldita si fai falta.
Cuando me vegas a min
gociosu fincar la pata
na portiella´l barcu, entrar,
y dar alguna pasada,
llora entóncenes mio reina
porqu´ha de ser cada llárima
pa´l probe emigrante un besu
de cariño y d´esperanza.
Cuando vegas marineros
atorollaos pela sala,
corriendo d´un llau pa utru
con una podriella llarga,
atando y soltando cuerdes
con una prisa que plasma,
una bandera del palu
na cuguruta más alta,
llora entóncenes, mio reina,
porq´ha de ser cada llárima
pa´l probe migrante un besu
de cariñu y d´esperanza.
Cuando vegas al naviyu
que suaviquino s´aparta,
xingándose fachendosu
so los gálamos del agua
y veas descolgar les veles
como fresca ñeve blanca
y sientas sele la brisa
agayándoti la cara
como pidiéndoti venia
pa purrir un´asoplada
qu´emburrie ´l barcu esnidiando
seliquino haza la barra,
llora entóncenes, mio reina,
porq´ha de ser cada llárima
pa´l probe migrante un besu
de cariñu y d´esperanza.
Y cuando na barra blinque
d´un galmiu cada foliada
y se funda´n frente d´otra
qu´esguilapie pa salviala,
cuartiáu pa que la repecha
seya menos emprunada,
y ya´n cumbrial de la fola
tase un tantín aña q´aña
y chúmbase de cabeza
derechu a la fondonada
pa tornar a´sgatilar
con mayor temple y puxanza,
y baxa otra vez y sube,
apigaza q´apigaza,
veslu andar.....correr.......fuxir.....
fasta´allá na columbranza
que s´esmuza´n migayines
entre la neblina blanca,
llora entóncenes, mio reina
porq´ha de ser cada llárima
pa´l probe migrante un besu
de cariñu y d´esperanza.
¡ Ay Dios ! y aquel pañuelín
que empape todes tos llárimes,
dempués que non acolumbres
el barcu, tíralu al agua,
y non temas que m´afuegue
perdidu na mar salada
q´han dir teniendo pel barcu,
mentres mar y cielu brama,
en isi blancu pañuelu
la pureza de to alma
y debaxo del naviyu
les llárimes d´una santa.
¡ Adiós !
Asturies, tierra mía,
terrina de mio madre idolatrada,
desde el dichosu día
en que t´abandoné cuánta agonía
mi dexo toda´l alma acongoxada.
Ay desgraciada suerte,
compañera feroz del emigrante,
por doquiera la muerte
dibujando su sombra en cada
instante
y amagando mortal su brazo
fuerte.